ആ കാര്യം ആൺകുട്ടികൾ അറിയുന്നത് ലജ്ജിക്കേണ്ടതും നാണിക്കേണ്ടതുമായ കാര്യമാണെന്ന ചിന്തയായിരുന്നു അന്ന് എനിക്ക്, അതങ്ങനെ ആയിരിക്കേണ്ടത് ഉണ്ടോ? ജ്യോത്സനയുടെ കുറിപ്പ് ശ്രദ്ധേയമാകുന്നു.

 

മലയാളികളുടെ എക്കാലത്തേയും പ്രിയപ്പെട്ട നായികമാരിൽ ഒരാളാണ് ജ്യോത്സ്ന. ഒരു സെലിബ്രിറ്റി സ്റ്റാറ്റസിനുള്ളിൽ തിളങ്ങി നിൽക്കുക എന്നതിനപ്പുറം സാമൂഹികമായ പല വിഷയങ്ങളിലും താരം നിലപാട് വ്യക്തമാക്കുന്നുണ്ട്. ഇപ്പോഴിതാ ആകുലതകൾ നിറഞ്ഞ സ്കൂൾ കാലഘട്ടത്തിലെ ആർത്തവ ദിനങ്ങൾ ഓർത്തെടുക്കുകയാണ് താരം. സ്കൂൾ കാലത്തെ ചിത്രം പങ്കുവച്ച് അന്നത്തെ അനുഭവങ്ങൾ കൂടി വിവരിച്ചുകൊണ്ടാണ് ജോത്സ്നയുടെ പോസ്റ്റ്.

ആർത്തവം ഒരു സാധാരണമായ ശാരീരിക പ്രക്രിയയാണെന്നും അതിനെക്കുറിച്ചു സംസാരിക്കാനുള്ള മടിയും ചമ്മലും മാറ്റണമെന്നുമാണ് സമൂഹ മാധ്യമത്തിൽ പങ്കുവച്ച കുറിപ്പിൽ ജ്യോത്സന പറയുന്നത്. സ്കൂൾ യൂണിഫോമിലുള്ള പഴയ ചിത്രവും ജ്യോത്സ്ന കുറിപ്പിനൊപ്പം പങ്കുവെച്ചു. ഈ ചിത്രത്തിലേക്ക് നോക്കുമ്പോൾ, ഞാൻ എത്ര ചെറുപ്പമായിരുന്നു എന്ന വസ്തുത തിരിച്ചറിയുന്നു, അന്ന് വളരെ സാധാരണമാണെന്ന് കരുതിയ ഒരുപാട് കാര്യങ്ങളിലേക്ക് എന്റെ കണ്ണുതുറക്കുന്നു. ലൂസായ യൂണിഫോം ധരിച്ചു ഷാൾ ഊരിവീഴാതെ വൃത്തിയായി തോളിൽ കുത്തി നിൽക്കുന്ന ഇതിൽ എനിക്ക് ഏകദേശം 14 വയസ്സ് പ്രായമുണ്ടായിരിക്കണം.

സ്പോർട്സ് ദിവസങ്ങളിൽ വെള്ള യൂണിഫോം ആയിരുന്നു ധരിക്കേണ്ടിയിരുന്നത്. ആർത്തവ സമയത്ത് അത് ധരിക്കാനുള്ള പേടി! ബെഞ്ചിൽ നിന്നും എഴുന്നേൽക്കുമ്പോഴെല്ലാം അടുത്തുള്ള പെൺസുഹൃത്തിനോട് ‘ഒന്നു നോക്കൂ’ എന്നു പറയും. ചുവന്ന നിറത്തിലുള്ള ഡിസൈൻ വന്നിട്ടുണ്ടാകല്ലേ എന്നായിരുന്നു പ്രാർഥന. ആവശ്യം വന്നാൽ ഉപയോഗിക്കാൻ പാഡുകൾ ബാഗിൽ നിറയ്ക്കുമായിരുന്നു. മാസത്തിലെ ആ നാല് ദിവസങ്ങളിൽ പുറത്തു കളിക്കാൻ വരാത്ത സുഹൃത്തുക്കളുമുണ്ട്. തങ്ങൾക്ക് ആർത്തവമാണെന്ന് ആരെങ്കിലും (പ്രത്യേകിച്ച് ആൺകുട്ടികൾ) അറിയുന്നത് ലജജിക്കേണ്ടതും നാണിക്കേണ്ടതുമായ കാര്യമാണെന്നായിരുന്നു ചിന്ത.

പക്ഷേ അത് അങ്ങനെ ആയിരിക്കേണ്ടതുണ്ടോ? ഒരു സാധാരണ, സ്വഭാവിക ശാരീരിക പ്രവർത്തനങ്ങളെക്കുറിച്ചുള്ള അത്തരം ചിന്തകൾ പതിനാലാം വയസ്സിൽ തന്നെ ഭാരമാകേണ്ടതുണ്ടോ? കാര്യങ്ങൾ പതിയെ മാറാൻ തുടങ്ങിയതു കാണുമ്പോൾ സന്തോഷം തോന്നുന്നു. ഇനിയും പതിയെ പതിയെ എല്ലാം ഉറപ്പായും മാറും. ചെറിയ പെൺകുട്ടികൾ ചെറിയപെൺകുട്ടികൾ തന്നെയായിരിക്കട്ടെ. ആദ്യ ആർത്തവം മുതൽ അവരെ ‘പക്വതയുള്ളവർ’ ആയി കാണരുത്. അവരുടെ പുസ്തകങ്ങളിൽ നിന്നും ലൈംഗിക പഠന പേജുകൾ ഒഴിവാക്കരുത്. നിങ്ങളുടെ പെൺകുട്ടികളോടും ആൺകുട്ടികളോടും അതിനെക്കുറിച്ചു സംസാരിക്കുക. അതിനുമേലുള്ള ലജ്ജയും വിലക്കും നീക്കുക. ആർത്തവം സാധാരണമാണ്, ലളിതവും’, ജ്യോത്സ്ന കുറിച്ചു.